Must see …

Khoye huway bachay
Or
Khoye huwi yadien kitni
Badqismat hoti hayne !

شوق ہر رنگ رقیب سر و ساماں نکلا
قیس تصویر کے پردے میں‌ بھی ۔۔۔۔۔ عریاں نکلا

زخم نے داد نہ دی ۔۔۔۔۔ تنگیِ دل کی یارب
تیر بھی سینہِ بسمل سے ۔۔۔۔۔ پُر افشاں نکلا

بوئے گل ۔۔۔۔۔ نالہِ دل ۔۔۔۔۔ بوئے چراغ محفل
جو تری بزم سے نکلا ۔۔۔۔۔ سو پریشاں نکلا

دلِ حسرت زدہ تھا ۔۔۔۔۔ مائدہِ لذت درد
کام یاروں کا بقدرِ لب و دنداں‌ نکلا

تھی نو آموز فنا ۔۔۔۔۔ ہمت دشوار پسند
سخت مشکل ہے کہ ۔۔۔۔۔ یہ کام بھی آساں نکلا

کر گیا ایک نظر میں وہ سبھی کو گھائل
اُس کی مژگاں سے ۔۔۔۔۔ سرِ بزم جو پیکاں‌ نکلا

دل میں‌ پھر گریے نے اِک شور اُٹھایا غالب
آہ ۔۔۔۔۔ جو قطرہ نہ نکلا تھا ۔۔۔۔۔ سو طوفاں‌ نکلا

غالب
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اس کے دل میں تو نہاں ۔۔۔۔۔ جذبہِ ایماں نکلا
جس کو سمجھا تھا میں کافر ۔۔۔۔۔ وہ مسلماں نکلا

اشک کیا چیز ہے ۔۔۔۔۔۔ اِک آہ نہ منہ سے نکلی
درد بھی دل سے مرے ہو کے ۔۔۔۔۔۔ پشیماں نکلا

آرزو ۔۔۔۔۔ حسرت و ارمان ۔۔۔۔۔ تمنا تیری
خانہِ دل میں مرے ۔۔۔۔۔ یہ سرو ساماں نکلا

پیرہن اُس کی انا کا ہے سلامت اب تک
میری چاہت کا مگر ۔۔۔۔۔ چاک گریباں نکلا

میں نے دیکھا تھا جو کچھ ۔۔۔۔۔ جاگتی آنکھوں سے کبھی
وہ حقیقت میں مرا خواب ۔۔۔۔۔ پریشاں نکلا

سی گیا زخم جگر بھی اِسی یک سوئی سے
وہ رفوگر تو مرے درد کا ۔۔۔۔۔ درماں نکلا

خو‌ں‌ بہا تک نہ دیا ۔۔۔۔۔ آہ مرے قاتل نے
خون ناحق مرا ۔۔۔۔۔ پانی سے بھی ۔۔۔۔۔ ارزاں نکلا

متین امروہوی

شکایت آج بھی تم سے نہیں ۔ ۔ ۔ کہ محرومی
تمہارے در سے نہ ملتی، تو گھر سے مل جاتی

تمہاری سنگ دلی سے خفا نہیں ہوتے ۔ ۔ ۔
کہ ہم سے اپنے ہی وعدے وفا نہیں ہوتے ۔ ۔ ۔
ــــــــــــــــــــــــــــــــــــــــــــــــــــــــــــــــــــــــــــــ
مصطفیٰ زیدی

وصال

وُہ نہیں تھی تو ۔۔۔۔۔ دل اِک شہرِ وفا تھا جس میں
اُس کے ہونٹوں کے تصور سے ۔۔۔۔۔ تپش آتی تھی
اُس کے اِنکار پہ بھی ۔۔۔۔۔ پُھول کِھلے رہتے تھے
اُس کے انفاس سے بھی ۔۔۔۔۔ شمع جلی جاتی تھی

دن اِس اُمید پہ کٹتا تھا ۔۔۔۔۔ کہ دِن ڈھلتے ہی
اُس نے کچھ دیر کو ۔۔۔۔۔ مل لینے کی مُہلت دی ہے
اُنگلیاں برق زدہ رہتی تھیں ۔۔۔۔۔ جیسے اُس نے
اپنے رُخساروں کو ۔۔۔۔۔ چُھونے کی اِجازت دی ہے

اُس سے اِک لمحہ الگ رہ کے ۔۔۔۔۔ جُنوں ہوتا تھا
جی میں تھی اُس کو نہ پائیں گے ۔۔۔۔۔ تو مر جائیں گے
وہ نہ ہوگی تو دَرک جائے گا ۔۔۔۔۔ پیمانہِ ماہ
تیرگی میں کسے ڈھونڈیں گے ۔۔۔۔۔ کِدھر جائیں گے

پھر ہُوا یہ کہ ۔۔۔۔۔ لپکتے ہوئے انگاروں میں
ہم تو جلتے تھے ۔۔۔۔۔ مگر اُس کا نشیمن بھی جلا
بجلیاں جس کی کِنیزوں میں رہا کرتی تھیں
دیکھنے والوں نے دیکھا کہ ۔۔۔۔۔ وُہ خِرمن بھی جلا
اُس میں اِک یوسفِ گم گشتہ کے ہاتھوں کے سِوا
اِک زلیخائے خُود آگاہ کا ۔۔۔۔۔ دامن بھی جلا

مصطفی زیدی

بِسۡمِ اللهِ الرَّحۡمٰنِ الرَّحِيۡمِ
_______________

وَلَنَبْلُوَنَّكُم بِشَيْءٍ مِّنَ الْخَوْفِ وَالْجُوعِ وَنَقْصٍ مِّنَ الْأَمْوَالِ وَالْأَنفُسِ وَالثَّمَرَاتِ ۗ وَبَشِّرِ الصَّابِرِينَ o الَّذِينَ إِذَا أَصَابَتْهُم مُّصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ o (سورہ بقرہ ١٥٥-١٥٦)

اور ہم کسی قدر خوف اور بھوک اور مال اور جانوں اور میوؤں کے نقصان سے تمہاری آزمائش کریں گے توصبر کرنے والوں کو (خدا کی خوشنودی کی) بشارت سنا دو. ان لوگوں پر جب کوئی مصیبت واقع ہوتی ہے تو کہتے ہیں کہ ہم خدا ہی کا مال ہیں اور اسی کی طرف لوٹ کر جانے والے ہیں.

یہ کس نے کہا تم کوچ کرو، باتیں نہ بناؤ انشا جی
یہ شہر تمہارا اپنا ہے، اسے چھوڑ نہ جاؤ انشا جی

جتنے بھی یہاں کے باسی ہیں، سب کے سب تم سے پیار کریں
کیا اِن سے بھی منہہ پھیروگے، یہ ظلم نہ ڈھاؤ انشا جی

کیا سوچ کے تم نے سینچی تھی، یہ کیسر کیاری چاہتے کی
تم جن کو ہنسانے آئے تھے، اُن کو نہ رلاؤ انشا جی

تم لاکھ سیاحت کے ہو دھنی، اِک بات ہماری بھی مانو
کوئی جا کے جہاں سے آتا نہیں، اُس دیس نہ جاؤ انشا جی

بکھراتے ہو سونا حرفوں کا، تم چاندی جیسے کاغذ پر
پھر اِن میں اپنے زخموں کا، مت زہر ملاؤ انشا جی

اِک رات تو کیا وہ حشر تلک، رکھے گی کھُلا دروازے کو
کب لوٹ کے تم گھر آؤ گے، سجنی کو بتاؤ انشا جی

نہیں صرف “قتیل“ کی بات یہاں، کہیں “ساحر“ ہے کہیں “عالی“ ہے
تم اپنے پرانے یاروں سے، دامن نہ چھڑاؤ انشا جی

ابھی کچھ اور کرشمے غزل کے دیکھتے ہیں
فراز اب ذرا لہجہ بدل کے دیکھتے ہیں

جدائیاں تو مقدر ہیں پھر بھی جان سفر
کچھ اور دور ذرا ساتھ چل کے دیکھتے ہیں

رہ وفا میں حریف خرام کوئی تو ہو
سو اپنے آپ سے آگے نکل کے دیکھتے ہیں

تو سامنے ہے تو پھر کیوں یقیں نہیں آتا
یہ بار بار جو آنکھوں کو مل کے دیکھتے ہیں

یہ کون لوگ ہیں موجود تیری محفل میں
جو لالچوں سے تجھے ، مجھ کو جل کے دیکھتے ہیں

یہ قرب کیا ہے کہ یک جاں ہوئے نہ دور رہے
ہزار ایک ہی قالب میں ڈھل کے دیکھتے ہیں

نہ تجھ کو مات ہوئی ہے نہ مجھ کو مات ہوئی
سو اب کے دونوں ہی چالیں بدل کے دیکھتے ہیں

یہ کون ہے سر ساحل کے ڈوبنے والے
سمندروں کی تہوں سے اچھل کے دیکھتے ہیں

ابھی تلک تو نہ کندن ہوئے نہ راکھ ہوئے
ہم اپنی آگ میں ہر روز جل کے دیکھتے ہیں

بہت دنوں سے نہیں ہے کچھ اسکی خیر خبر
چلو فراز کوئے یار چل کے دیکھتے ہیں
______
فراز

تیرے ہوتے ہوئے محفل میں جلاتے ہیں چراغ
لوگ کیا سادہ ہیں سورج کو دکھاتے ہیں چراغ

اپنی محرومی کے احساس سے شرمندہ ہیں
خود نہیں رکھتے تو اوروں کے بجھاتے ہیں چراغ

بستیاں دور ہوئی جاتی ہیں رفتہ رفتہ
دمبدم آنکھوں سے چھپتے چلے جاتے ہیں چراغ

کیا خبر ان کو کہ دامن بھی بھڑک اٹھتے ہیں
جو زمانے کی ہواؤں سے بچاتے ہیں چراغ

گو سیہ بخت ہیں ہم لوگ پہ روشن ہے ضمیر
خود اندھیرے میں ہیں دنیا کو دکھاتے ہیں چراغ

بستیاں چاند ستاروں کی بسانے والو!
کرہءِ ارض پہ بجھتے چلے جاتے ہیں چراغ

ایسے بے درد ہوئے ہم بھی کہ اب گلشن پر
برق گرتی ہے تو زنداں میں جلاتے ہیں چراغ

ایسی تاریکیاں آنکھوں میں بسی ہیں کہ فراز
رات تو رات ہے ہم دن کو جلاتے ہیں چراغ
_________
احمد فراز

جو دل قابو میں ہو تو کوئی رسوائے جہاں کیوں ہو
خلش کیوں ہو، طپش کیوں ہو، قلق کیوں ہو، فغاں کیوں ہو

مزا آتا نہیں تھم تھم کے ہم کو رنج و راحت کا
خوشی ہو غم ہو جو کچھ ہو الٰہی ناگہاں کیوں ہو

یہ مصرع لکھ دیا ظالم نے میری لوح تربت پر
جو ہو فرقت کی بیتابی تو یوں خواب ِگراں کیوں ہو

ہمیشہ آدمی کا آدمی غمخوار ہوتا ہے
یہی بے اعتباری ہو تو کوئی راز داں کیوں ہو

غضب آیا ستم ٹوٹا قیامت ہوگئی برپا
یہ پوچھا تھا کہ تم آزردہ مجھ سے میری جاں کیوں ہو

بہت نکلیں گے روز محشر تیرے جور کے خواہاں
ستم کا حوصلہ دنیا میں صرف امتحاں کیوں ہو

اُنہیں گو رنجش بیجا ہے، لیکن ہے تو، ہم سے ہے
محبت گر نہ ہو باہم شکایت درمیاں کیوں ہو

گئے ٹھکرا کے مجھ کو اور پھر کہتے گئے یہ بھی
نصیب دشمناں تو پائمال آسماں کیوں ہو

نئی تاکید ہے ضبط محبت کی وہ کہتے ہیں
جگر ہو تو فغان کیوں ہو، دہن ہو تو زباں کیوں ہو

شریک دور مے بزم عدو میں خاک ہوئے ہم
کسی نے رات بھر اتنا نہ پوچھا تم یہاں کیوں ہو

تحمل کر سکے کیا حسن نازک اُن نگاہوں کا
اُسے میں نے چھپایا ہے وگر نہ وہ نہاں کیوں ہو

خدا شاہد خدا شاہد ہے کیوں کہتے ہو وعدوں پر
خدا کو کیا غرض میرے تمہارے درمیاں کیوں ہو

جگر سے کم نہیں اے چارہ گر داغِ جگر مجھ کو
جو پیدا کی ہو مر مر کر وہ دولت رائیگاں کیوں ہو

نوید جانفزا ہے کیا خبر قاتل کے آنے کی
بتاؤ تو سہی تم داغ ایسے شادماں کیوں ہو

داغ